Articoli & interventiEvidenza

Sa limba e lu sassaresu, sardhofoni e sassaresofoni

L’insegni di l’esercitzi di cummetziu ischritti in sassaresu no aribini a tre. So guasi tutti in itarianu, ingresu, cinesu, etc.. N’acciappemmu, inveci, umbè ischritti in sardhu

Si abeddi posthu afficcu, a Sassari l’insegni di l’esercitzi di cummetziu ischritti in sassaresu no aribini a tre. So guasi tutti in itarianu, ingresu, cinesu, etc.. N’acciappemmu, inveci, umbè ischritti in sardhu. Andà bè. Nisciunu à nudda contr’a lu sardhu, è la mamma, o si vuriddi lu babbu, di lu sassaresu. Fattu è, parò, ki so dui linghi dibessi si puru so di la matessi famiria. L’isthima ki li sassaresofoni ani parò pa lu sardhu no è turradda da li sardhofoni pa lu sassaresu. Abisumeu kistha linga no si lu miriscia, akì la mentariddai di kisthi sardhofoni, ki magarri in famiria fabeddani in itarianu, è ki la d’eddi è una linga, la linga sardha vera, e no un diarettu cumenti lu ki s’ipreca a Sassari, Sossu, Porthudorra, etc..

La cuipa è di li sassaresi puru ki ani fattu di tuttu pa falla dibintà un suipu d’isthiri cionfraioru, imbiuddendira di guasi tutta la digniddai soia. È parò diffitziri pa un sassaresofonu atzittà kissu cabbu sardhofonu, ipezia candu a purthallu so kissi “natziunaristhi” e “patrioti” ki voni fagocità li linghi di minorantzia ke lu sassaresu pa “Sa limba sardha comuna”. Dibenta inveci propiu impussibiri candu kissa puritigga arribi direttamenti da l’isthituzioni regionari. Lu riferimentu è a kissi targhi ki jà da lu 2014 dazini riccunnoscimentu a kissi buttrei ki ani fattu l’isthoria e so isthaddi impurthanti i la tradizioni di lu loggu indì s’acciappani ancora e, propiu paghisthu, so tisthimuniantzia di lu passaddu culturari isdhobaddaddi in una pruipittiba a vinì. Ma cu’ la tradizioni, e cu’ la cultura, è isthorica fintzamenta kissa linga ki a kissu patrimoniu è liadda a pari, a Sassari è lu Sassaresu. La Regioni no n’à tentu contu, e i la targha, olthri a l’itarianu, in sardhu LSC v’è ischrittu “Buttega istorica de Sardigna”. Tuttu, francu ke lu sassaresu, ki pudia assé “Butrea isthorica di Sardhigna”. No v’è kistha dibessiddai manna, è veru, ma manca la caratterizatzioni tradiziunari di la tziddai.  A Sassari so abisumeu una vintina li buttrei ki ani kissi targhi regionari.

In Sardhigna abemmu bisognu di una linga ki pimmittia a lu poburu sardhu d’assé libaru da l’itarianu, kisthu, parò, no vo dì di buggatziru. È una prigonta democratica pa dà la pussibiriddai a li sardhi di comunicà tra eddi pari pari, ma a lu matessi tempu debi dà garantzia di ripettu a lu sassaresu e ki li pimmittia d’assé linga coufitziari i la cabura linghisthigga soia, umpari a lu sardhu e a l’itarianu. Tandu, abà ki la leggi noba regionari, la 22 di lu 2018, dizi ki fintzamenta lu sassaresu debi assè apprubaddu, amparaddu, e varorizaddu puru i la cartellonisthigga – no è ki primma no si pudissia fà cu’ la leggi 26 di lu ’97 –, saristhia justhu ki kissi targhi siani ischritti fintze in kistha linga e cun la matessi impurthantzia grafica di l’althri prisenti i lu carthellu. La Regioni, a ghia sardhistha, pudaristhia dà un beddu esenpiu di ripettu a la comuniddai linghisthigga sassaresa ciambendi kissi targhi kena fà aisità troppu li sassaresi.

Fabritziu Dettori

Tags

Articoli collegati

Back to top button
Close
Close

Adblock Detected

Please consider supporting us by disabling your ad blocker
%d blogger hanno fatto clic su Mi Piace per questo: